കഥ

ആകാശം നിർത്താതെ കരഞ്ഞുകൊണ്ടിരുന്ന

നനഞ്ഞൊട്ടിയ ഒരു രാത്രിയിലാണ്‌

ഉപ്പയിൽ നിന്ന്

ഞാൻ ഉമ്മയിലേക്ക്‌ വീണത്‌

.

ഭീകരമായ ശർദ്ദിലിന്റെ

തുടർച്ചയായ ആറാഴ്ചകൾക്ക്‌ ശേഷം

മെല്ലെ മെല്ലെ

ഉമ്മയെ ഞാൻ നിലത്ത്‌ നിർത്തിതുടങ്ങി

.

പിന്നെ പിന്നെ

സമയം കിട്ടുമ്പോഴൊക്കെ

വെണ്ണീറിന്റെ പുളിയുള്ള കൈകൊണ്ട്‌

ഉമ്മയെന്നെ

തഴുകാൻ തുടങ്ങി

.

ചിലപ്പോഴൊക്കെ

ഉപ്പയും ഉമ്മയുടെ

നീളൻ ജാക്കറ്റിനുള്ളിലൂടെ കയ്യിട്ട്‌

എന്നെ തഴുകിക്കൊണ്ടിരുന്നു

.

ഉമ്മയുടെ വയറ്റിലെ

ഉപ്പ സങ്കൽപ്പിച്ചുണ്ടാക്കിയ മുഴകൾ

ഞാനുണ്ടാക്കിയതാണെന്ന്

ഉപ്പ എല്ലാവരോടും പറഞ്ഞുനടന്നത്‌

ആ കാലത്താണ്‌

.

ബോറടിക്കുമ്പോഴൊക്കെ

ഞാൻ കരണം മറിയുകയും

തലകുത്തി നിൽക്കുകയും

ചിലപ്പോഴൊക്കെ

ഒരു സർക്കസ്‌ അഭ്യാസിയെപ്പോലെ

ഒറ്റക്കാലിൽ തിരിയുകയും ചെയ്തു

.

തിരിഞ്ഞുകിടക്കുന്നത്‌

എനിക്കിഷ്ടമല്ലായിരുന്നു

കൈ തലക്കടിയിൽ വെച്ച്‌

ഉമ്മ ചരിഞ്ഞുകിടക്കുമ്പോഴൊക്കെ

ശക്തമായി തൊഴിച്ചോ അടിച്ചോ

ഞാനുമ്മയെ മലർത്തിക്കിടത്തി

.

എന്റെ കാലും കയ്യും

എന്നെ കൂടുതൽ അനുസരിക്കാൻ തുടങ്ങിയതോടെ

നിരന്തരമായി

ഞാനുമ്മയെ അക്രമിച്ചുകൊണ്ടിരുന്നു

.

ഒടുവിൽ

മഴതുടങ്ങുന്നകാലത്ത്‌

കൂട്ടത്തോടെ മാത്രം വരാറുള്ള

മേലേതൊടിയിലെ പട്ടികൾ

നിർത്താതെ കൂവികൊണ്ടിരുന്ന ഒരു രാത്രിയിൽ

ഉമ്മയെന്നെ

ലീലാമ്മയുടെ കയ്യിലേക്കിട്ടു

.

അന്നുമുതലാണ്‌

ഞാനെന്നും പറയാറുള്ളതുപോലെ

ഞാനാരുടേതുമല്ലാതായിത്തീർന്നത്‌

.

എന്നിട്ടും കരയാൻ കൂട്ടാകാതിരുന്ന എന്നെ

കരയിക്കാൻ വേണ്ടി മാത്രം

ഉപ്പ നുള്ളിയ പാണ്ടാണ്‌

നീയിന്നലക്കണ്ട

ഇടത്തേ തുടയിലെ കറുത്ത പാട്‌.

12 comments:

Anonymous said...

അബ്ദുവേ
ഇങ്ങിനെ ഓരോ മറുകും പുതുപ്പെണ്ണിനു കാണിച്ച്കൊടുക്കുമ്പൊ നീയ്യ് കവിതെയെഴുതി ഞങ്ങളെ ഇങ്ങിനെ സ്വർഗ്ഗത്തിലേക്ക് കൂട്ടിക്കൊണ്ടാവണല്ലോടാ...

കരീം മാഷ്‌ said...

നന്നായിരിക്കുന്നു.
പത്തുമാസം നീളുന്ന ഒരു പാഠ്യപദ്ധതി!

Abdu said...

ഇതാരാ അപ്പാ ഈ അനോണി?

നല്ല പരിചയമുള്ള ശബ്ദം

Mahi said...

അബ്ദു ഷോക്കടിപ്പിച്ചു കളഞ്ഞു.ഇങ്ങനെ ഇത്ര തീവ്രമായ്‌ എഴുതാന്‍ കഴിയുന്നു

siva // ശിവ said...

ലളിതം ഈ വരികള്‍...

simy nazareth said...

എന്തൊരു സൌന്ദര്യാനുഭവം അബ്ദുവേ. ഇഷ്ടപ്പെട്ടു.

Sanal Kumar Sasidharan said...

മനോഹരം എന്നു പറയാമോ.. മനോഹരമായി നോവിക്കുന്നതിനെ എന്തു പേരു പറയും!

സുനീഷ് said...

ഇങ്ങനെയാണ് ആരും ആരുടേതുമല്ലാതാകുന്നത് അല്ലേ? മനോഹരം.

Anonymous said...

ഹൃദ്യം..

Jayasree Lakshmy Kumar said...

സാധാരണ ഒറ്റയടിയാണ് കൊടുക്കാറുള്ളത്.

പക്ഷെ ആരുടേയുമല്ലാതായി എന്നാരു പറഞ്ഞു. ഒറ്റനുള്ളു കൊണ്ട് എല്ലാവരുടേതുമാക്കി കളഞ്ഞില്ലേ

തമാശന്‍ said...

ഈ പാവം തമാശനെ കരയിക്കരുത്...

രാജീവ് സാക്ഷി | Rajeev Sakshi said...

നന്നായിരിക്കുന്നു, അബ്ദു!